Chinablogphil

Gundach ihr Leit!

Schuldischung, dass der Intrach do jetzt so lang gebraucht hat, es is irchendwie e bissje unnergang mit dem ganze Brimborium von de ledschd wuch.

So allgemein kennt ma sahn, dass mir so langsam ahnfange e bissje meh zu verstehn. Uns jedefalls scheine die Chinese ganz gudd ze verstehn, nur wenn se nohfrohe stehe ma e bissje uffm Schlauch. Trotzdem krimmer eichendlich immer das, was ma hann wollde.

Ich spiehre so langsam e gewisser Innfluss vunn de Saarlänner, ich merke kaum noch ob ich jetzt Hochdeitsch odder Saarlännisch schwätze.

Un sonsch? Also mir sinn halt jetzt in Xiamen ankomm, un ich muss sahn, es is echt scheen do. Die Stadt insgesamt is ziemlich grien, iwwerall sinn greßere und kleenere Parks. Drei Minudde Fußwech von unserm Hoschdel entfernt is der „Zhongshan Park“, dass is e rechd großer und werklich scheener Park. Außerdem ware ma noch uffm „Gulangyu Island“, das is so e kleeni Insel, die Xiamen vorgelachert is. Dort dürfe nur Elektroaudochas druff rumfahre, es hat ganz scheene Stränd dort (obwohls Wasser net so sauwer war, mir sinn jedefalls net schwimme gang) und sehr viel Tourischde. Im Große un Ganze hammer halt es übliche Touriezeich abgeklabbert, doriwwa zu schreiwe is recht langweilich, deshalb lad ich liwwer e paar Bilder hoch.

Zhongshan Park:





Gulangyu Island:







Siming Campus (das is der alde Campus wo mir nimmi sinn):







Inderressander sinn wie immer die Kleenichkeete.
Ma werd doh zum Beispiel viel meh angeklozt als wie in Shanghai. Mir hodde schunn e paar Leit, die ganz offe gefroht hann, ob se e foddo mit uns mache derfe, so hinnerm Rigge werd ma alle furz lang foddografiert. Un stännich hert ma se iwwer die „laowais“ schwätze. Is awwer alles halb so wild. Nur das mir e bissje Probleme hann e Taxi se kriehn nervt e bissje. Do wisse ma awwer net, ob das an unserer allgemeine Unfähichkeit leit, odder ob die kehn ausländer leide kenne. Das glahwe ma awwer ehrlich gesaht net, dodefür wird ma zu oft von nette leit ahngeschwätzt, die eenem eenfach nur was verzähle wolle.

Xiamen is e recht kleeni Stadt, deshalb gebts do kehn Ubahn. Ma muss weidere Stregge also mim Taxi odder mim Bus sericklehe. Busfahre awwer koscht zum Beispiel nur 1 Yuan, egal wie weit ma fahrt (newebei: 8 Yuan sinn ungefähr einer Euro).

Für Leit wo geer Meeresfrichde esse is Xiamen es Paradies. Frischer kritt ma das Zeich kaum. Vor faschd jeder Wertschaft stehn haufeweis Aquarie, in denne ma sich halt sei Esse aussucht un das werd dann halt direkt gekocht. Mir hann ah schunn komisches Zeich gess, zum Beispiel Seeassele. Die hann zwar echt gruselich ausgesiehn unn es hat iwwerwindung koscht die ze prowiere, awwer im Endeffekt ware se sau legger.













Langsam setze bei uns die Endzuchserscheinunge inn, was es westliche Esse ahngeht. Vorgischder ware mer mohl bei Pizza Hut, der im 24. Stock von nem Hochhaus direkt am Strand war. Von dort hotte ma e scheener Ausblick uffs Gulangyu Island. Geschmeckt hatts halt wie Pizza Hut. Beim Friehstick vermisse alle gar die Siessschmier un e gudder Kaffee. Abgesiehn dodevunn is alles gudd.

Das wars dann erschdemol, ich melle mich dann widder wenns was neies gebt (das wird wahrscheinlich dann sinn, wann die Uni anfangt). Alle Hopp dann, bis zum nächschde mol.

dein saarpälzisch werd uff jedefall besser!

Jetz verstehn dei Cousine, Dei Oma unn so weider dich wenigschtens ah mo. Mir hann gedenkt du schreibscht die ganz zeit chinesisch... :-)

LG Chr.

... wofier ma sich schäme muss nur wenn ma mo platt schwätzt.

Allerdings sind das doch keine Seeasseln du Banause. Sieht aus wie Crevettes, fang dir nur keine fiesen Gehirnparasiten ein :)

Hallo, zum Geburtstag wünschen wir dir alles Gute.
Von Oma Gerda ebenfalls.

lg. die Ginkels

Hi Philipp,

vum Caro unn mir nadierlisch aach alles gudde zum Gebortsdaach.
Grüße ausm Saarland.

Kennsch mir so a gelwer pagge vun dene hinkelsfieß metbringe wenn de wirrer kumschd.